డైలీ భారత్, న్యూఢిల్లీ: జాతీయ షెడ్యూల్డ్ కులాల కమిషన్ (NCSC) అధికారాలపై సుప్రీంకోర్టు కీలక తీర్పు వెలువరించింది. ఎస్సీ కమిషన్ ఒక సిఫార్సులు చేసే, సలహాలు ఇచ్చే సంస్థ మాత్రమేనని, న్యాయస్థానం లేదా క్వాసి-జ్యుడీషియల్ సంస్థలా వ్యవహరిస్తూ బైండింగ్ ఆదేశాలు జారీ చేసే అధికారం లేదని స్పష్టం చేసింది.
రాజ్యాంగంలోని నిబంధనల ప్రకారం ఎస్సీ కమిషన్‌కు ఫిర్యాదులను విచారించడం, సంబంధిత అంశాలపై దర్యాప్తు చేయడం, కేంద్ర మరియు రాష్ట్ర ప్రభుత్వాలకు సిఫార్సులు చేయడం వంటి అధికారాలు ఉన్నాయని కోర్టు పేర్కొంది. అయితే వివాదాలను తేల్చడం, తుది నిర్ణయాలు ఇవ్వడం లేదా అమలు చేయాల్సిన ఆదేశాలు జారీ చేయడం కమిషన్ పరిధిలోకి రావని వెల్లడించింది.
ఈ తీర్పుతో జాతీయ ఎస్సీ కమిషన్ పాత్రపై స్పష్టత వచ్చినట్లు న్యాయ నిపుణులు అభిప్రాయపడుతున్నారు. కమిషన్ తన రాజ్యాంగబద్ధ విధులైన ఎస్సీల హక్కుల పరిరక్షణ, సంక్షేమంపై ప్రభుత్వాలకు సూచనలు చేయడం, నివేదికలు సమర్పించడం వంటి బాధ్యతలకే పరిమితమవుతుందని సుప్రీంకోర్టు పేర్కొంది.
