డైలీ భారత్ కరీంనగర్: కరీంనగర్ నుంచి హైదరాబాద్ కి ప్రయాణికులతో బయల్దేరిన ఒక ప్రభుత్వ ఎలక్ట్రిక్ బస్సులో ఆదివారం ఉదయం ఘోర అగ్నిప్రమాదం చోటుచేసుకుంది. ప్రయాణంలో ఉండగా హఠాత్తుగా షార్ట్ సర్క్యూట్‌ కారణంగా బ్యాటరీ విభాగంలో మంటలు చెలరేగడంతో బస్సు పూర్తిగా దగ్ధమైంది. అయితే, డ్రైవర్ సమయస్ఫూర్తి, అత్యంత అప్రమత్తత కారణంగా లోపల ఉన్న 40 మంది ప్రయాణికులు తృటిలో ప్రాణాపాయం నుంచి తప్పించుకున్నారు. ఈ ఘటనతో కరీంనగర్ శివారులోని అలుగునూరు ప్రాంతంలో ఒక్కసారిగా తీవ్ర కలకలం రేగింది.

స్థానికులు మరియు ఆర్టీసీ రవాణా శాఖ అధికారులు వెల్లడించిన వివరాల ప్రకారం.. కరీంనగర్ డిపోనకు చెందిన ఎలక్ట్రిక్ బస్సు ఆదివారం ఉదయం 8:00 గంటల సమయంలో 40 మంది ప్రయాణికులతో హైదరాబాద్‌కు బయల్దేరింది. బస్సు కరీంనగర్ నగరాన్ని దాటి, అలుగునూరు మీదుగా రాజీవ్ రహదారిపై కాకతీయ కాలువ సమీపంలోకి రాగానే ఇంజిన్/బ్యాటరీ భాగం నుండి దట్టమైన పొగలు మరియు మంటలు రావడం ప్రారంభమైంది. షార్ట్‌సర్క్యూట్ కారణంగానే ఈ ప్రమాదం జరిగినట్లు ప్రాథమికంగా గుర్తించారు.

డ్రైవర్ ప్రశాంత్ సమయస్ఫూర్తి – 40 మంది ప్రయాణికులు సురక్షితం

బస్సు నడుపుతున్న డ్రైవర్ ప్రశాంత్ అద్దంలో పొగలను గమనించి క్షణాల్లో అప్రమత్తమయ్యారు. ఏమాత్రం కంగారు పడకుండా బస్సును వెంటనే రహదారి పక్కకు నిలిపివేశారు. డ్రైవర్ వెంటనే బస్సు ప్రధాన హైడ్రాలిక్ డోర్‌తో పాటు అత్యవసర ద్వారాలను  తెరిచి, ప్రయాణికులను సామాన్లతో సహా త్వరత్వరగా కిందకు దిగిపోవాలని కేకలు వేశారు. ప్రయాణికులందరూ సురక్షితంగా కిందకు దిగిన ఐదు నిమిషాల వ్యవధిలోనే మంటలు బస్సు మొత్తానికి వేగంగా వ్యాపించాయి.

మంటలు చిన్నగా ఉన్నప్పుడే డ్రైవర్ మరియు కండక్టర్ బస్సులో ఉన్న అగ్నిమాపక పరికరాలను ఉపయోగించి ఆర్పేందుకు ప్రయత్నించినప్పటికీ, ఎలక్ట్రిక్ బస్సు కావడంతో మంటలు ఉవ్వెత్తున ఎగిసిపడి అదుపులోకి రాలేదు. సమాచారం అందుకున్న ఫైర్ సిబ్బంది అగ్నిమాపక శకటంతో ఘటనాస్థలికి చేరుకుని మంటలను పూర్తిగా అదుపులోకి తెచ్చారు. ప్రయాణికులందరూ సురక్షితంగా ప్రాణాలతో బయటపడటంతో అధికారులు, కుటుంబ సభ్యులు ఊపిరి పీల్చుకున్నారు