డైలీ భారత్ స్పెషల్:
యాస... మన అస్తిత్వపు స్వరం...
యాసను చూసి మనిషిని కొలవకు...!
ఎందుకంటే... యాస వెనుక ఒక ఊరి ఊపిరి ఉంటుంది... ఆ ఊరి మట్టి పరిమళం ఉంటుంది... ఆ మట్టిలో తరతరాల మమకారం ఉంటుంది... ఆ మాటల్లో మనసుల మధురం ఉంటుంది...!
పుస్తకాల్లో భాషకు అక్షరాల అందం ఉంటే... పల్లె పెదవుల పలుకుల్లో జీవన గంధం ఉంటుంది...! గ్రంథాల్లో వ్యాకరణం ఉంటే... గ్రామీణ యాసలో అనుభవాల ఆభరణం ఉంటుంది...!
అది బడిలో బోధించిన భాష కాదు... అమ్మ ఒడిలో ఆలపించిన ఆప్యాయ గీతం... నాన్న నుదుటి చెమటలో నిండిన జీవన జ్యోతి... రైతు నేలతో పలికిన పచ్చని మాట... కూలీ కష్టంలో వినిపించిన నిజమైన గీతం..!
యాసను హేళన చేయడం అంటే... ఒక మాటను కాదు... ఒక మనిషి మూలాలను మట్టుబెట్టడం... అతని ఊరి గౌరవాన్ని గాయపరచడం... అతని జ్ఞాపకాల జాడలను చెరిపివేయడం...!
ప్రతి యాస వెనుక ఒక యుగం ఉంటుంది... ప్రతి పలుకు వెనుక ఒక అనుభవం ఉంటుంది... ప్రతి మాటలో ఒక మనిషి మనసు ఉంటుంది... ప్రతి స్వరంలో ఒక సంస్కృతి శ్వాసిస్తుంది...
యాస మారితే మనిషి మారడు... మాట మారినా మనసు మారదు... పలుకు మారినా పుట్టిన నేల మారదు... మారేది కేవలం భాషకు వచ్చిన భిన్నమైన అందం మాత్రమే..!
కాబట్టి... యాసలను ఆదరిద్దాం... భాషలను ప్రేమిద్దాం... భిన్నత్వంలోని అందాన్ని ఆస్వాదిద్దాం...!
ఎందుకంటే... భాష మనల్ని కలుపుతుంది... యాస మన మూలాలను నిలుపుతుంది... యాసను గౌరవించడం అంటే... మన సంస్కృతికి శిరస్సు వంచి నమస్కరించడం మాత్రమే..!
అదే నిజమైన విద్య... అదే నిజమైన వినయం... అదే నిజమైన సంస్కారం... అదే నిజమైన నాగరికత.
రచన: మంజుల పత్తిపాటి
మాజీ ఆలేరు వ్యవసాయ మార్కెట్ కమిటీ డైరెక్టర్
యాదాద్రి భువనగిరి జిల్లా
తెలంగాణ రాష్ట్రం
చరవాణి 9347042218.
