డైలీ భారత్, కామారెడ్డి: కామారెడ్డి జిల్లా పోలీస్ కార్యాలయంలో ఘనంగా వాసవి కన్యకా పరమేశ్వరి మాత జయంతి వేడుకల నిర్వహణ
వాసవి మాత త్యాగం, అహింసా మార్గం సమాజానికి ఆదర్శం: జిల్లా ఎస్పీ యం. రాజేష్ చంద్ర, ఐపీఎస్
శాంతి, ధర్మ పరిరక్షణలో ప్రతి ఒక్కరూ భాగస్వాములు కావాలి: వాసవి మాత జయంతి వేడుకల్లో ఎస్పీ పిలుపు
కామారెడ్డి జిల్లా పోలీస్ కార్యాలయంలో వాసవి కన్యకా పరమేశ్వరి మాత జయంతి ఉత్సవాలు భక్తి శ్రద్ధలతో ఘనంగా నిర్వహించబడ్డాయి. ఈ సందర్భంగా జిల్లా ఎస్పీ యం. రాజేష్ చంద్ర, ఐపీఎస్ మాతవారి చిత్రపటానికి పూలమాల సమర్పించారు.
ఈ సందర్భంగా ఎస్పీ మాట్లాడుతూ, వాసవి మాత త్యాగం, అహింసా మార్గం సమాజానికి ఆదర్శమని తెలిపారు. ఆమె చూపిన సత్యం, న్యాయం, శాంతి మార్గంలో నడవడం ప్రతి ఒక్కరి బాధ్యత అని పేర్కొన్నారు. సమాజంలో శాంతి, సౌహార్దం, నైతిక విలువలను పెంపొందించుకోవడమే వాసవి మాత జయంతి సందేశమని అన్నారు.
అలాగే శాంతి, ధర్మ పరిరక్షణలో ప్రతి ఒక్కరూ భాగస్వాములు కావాలని, సమాజంలో న్యాయం, సౌహార్దం నెలకొల్పడంలో అందరూ తమ వంతు పాత్ర పోషించాలని ఎస్పీ పిలుపునిచ్చారు. విలువలు ఉన్న సమాజమే శక్తివంతమైన దేశానికి పునాదని ఆయన తెలిపారు.
ఈ కార్యక్రమంలో అదనపు ఎస్పీ నర్సింహా రెడ్డి, రిజర్వ్ ఇన్స్పెక్టర్ సంతోష్ మరియు పోలీస్ సిబ్బంది పాల్గొని మాత చిత్రపటానికి పుష్పాంజలి ఘటించారు.
