టాక్స్ అడిట్ రిపోర్ట్ కోసం రూ. 50 వేలు లంచం: ఏసీబీకి చిక్కిన నిర్మల్ స్టేట్ టాక్స్ ఆఫీసర్, సీనియర్ అసిస్టెంట్!
డైలీ భారత్, నిర్మల్/ఆదిలాబాద్: నిర్మల్ జిల్లాలో అవినీతి నిరోధక శాఖ (ACB) అధికారులు భారీ వేట సాగించారు. ఒక జువెల్లరీ వ్యాపారి నుండి ఆడిట్ రిపోర్టులో అనుకూల నివేదిక ఇవ్వడం కోసం రూ. 50,000 లంచం తీసుకుంటూ రాష్ట్ర పన్నుల శాఖ (State Taxes Department) అధికారులు ఇద్దరు రెడ్ హ్యాండెడ్‌గా పట్టుబడ్డారు. ఆదిలాబాద్ రేంజ్ ఏసీబీ అధికారులు నిర్మల్ సర్కిల్ కార్యాలయంలో ఈ ఆపరేషన్ నిర్వహించారు.
ఆడిట్ క్లియరెన్స్ కోసం డిమాండ్:
మంచిర్యాల పట్టణానికి చెందిన లక్కింశెట్టి వీర భాస్కర రావు అనే జువెల్లరీ దుకాణ యజమానికి సంబంధించిన 2022-23 మరియు 2023-24 ఆర్థిక సంవత్సరాల ఆడిట్ లెక్కల తనిఖీ బాధ్యతను నిర్మల్ స్టేట్ టాక్స్ అధికారులు తీసుకున్నారు. ఈ ఆడిట్‌లో ఎలాంటి తప్పులు చూపించకుండా, వ్యాపారికి అనుకూలంగా నివేదిక సమర్పించడానికి నిర్మల్, ఆదిలాబాద్ జిల్లాల స్టేట్ టాక్స్ ఆఫీసర్ (STO) కొప్పెల గోదావరి, సీనియర్ అసిస్టెంట్ మంత్రి సాయికృష్ణ లంచం డిమాండ్ చేశారు.
రూ. 50 వేలకు ఒప్పందం.. ఏసీబీ వ్యూహం:
అధికారులు మొదట లక్ష రూపాయల భారీ మొత్తాన్ని డిమాండ్ చేయగా, చివరకు రూ. 50 వేలు ఇచ్చేందుకు ఒప్పందం కుదిరింది. అంత లంచం ఇచ్చుకోలేక బాధితుడు ఆదిలాబాద్ ఏసీబీ డీఎస్పీని ఆశ్రయించి ఫిర్యాదు చేశారు. రంగంలోకి దిగిన ఏసీబీ అధికారులు పక్కా వ్యూహంతో సోమవారం నిర్మల్ లోని స్టేట్ టాక్స్ కార్యాలయంలో మాటు వేశారు.
బాధితుడి నుండి సీనియర్ అసిస్టెంట్ మంత్రి సాయికృష్ణ కెమికల్ పూసిన నోట్లను తీసుకుంటుండగా ఏసీబీ అధికారులు రెడ్ హ్యాండెడ్‌గా పట్టుకున్నారు. ఆయన ఇచ్చిన సమాచారంతో ఎస్టీఓ కొప్పెల గోదావరిని కూడా ఏసీబీ నిందితురాలిగా చేర్చింది. అధికారులు ఇద్దరి చేతులకు కెమికల్ పరీక్షలు నిర్వహించగా పాజిటివ్ అని తేలింది.
కార్యాలయంలో కలకలం - అధికారుల అరెస్ట్:
కార్యాలయంలోనే ఏసీబీ అధికారులు లంచం సొమ్మును రికవరీ చేసి, నిందితులను అరెస్ట్ చేశారు. వారి నివాసాల్లో కూడా ఏకకాలంలో సోదాలు నిర్వహిస్తున్నారు. నిందితులను కరీంనగర్ ఏసీబీ ప్రత్యేక కోర్టులో హాజరుపరచనున్నట్లు అధికారులు తెలిపారు. ప్రభుత్వ కార్యాలయాల్లో ఎవరైనా లంచం డిమాండ్ చేస్తే వెంటనే టోల్ ఫ్రీ నెంబర్ 1064 కు ఫిర్యాదు చేయాలని ఏసీబీ డీఎస్పీ ఈ సందర్భంగా ప్రజలకు విజ్ఞప్తి చేశారు.
