డైలీ భారత్, రాజన్న సిరిసిల్ల: తెలంగాణ కోసం కొట్లాడిన ఉద్యమకారులను ప్రభుత్వం తక్షణమే గుర్తించి, ఇచ్చిన హామీలను సెప్టెంబర్ 17 లోపు అమలు చేయాలని తెలంగాణ ఉద్యమకారుల JAC జిల్లా చైర్మన్ గజ్జెల దేవరాజు డిమాండ్ చేశారు. లేనిపక్షంలో "ఉద్యమకారుల కోసం ఉద్యమం" నినాదంతో రాష్ట్రవ్యాప్తంగా పెద్ద ఎత్తున ఉద్యమం చేపడతామని హెచ్చరించారు.
సిరిసిల్లలోని బి.వై. నగర్ కు చెందిన ఉద్యమకారుడు మేకల రామచంద్రం అనారోగ్యంతో ఇంటికే పరిమితమైన విషయం తెలుసుకుని JAC ఆధ్వర్యంలో ఆయనను పరామర్శించి ఆర్థిక సహాయం అందించారు. తెలంగాణ ఉద్యమంలో రిలే దీక్షలు, సకల జనుల సమ్మె, వంటా వార్పులో రామచంద్రం కీలక పాత్ర పోషించారని దేవరాజు తెలిపారు.
తెలంగాణ తెచ్చిన ఉద్యమకారులే నేడు ఆర్థిక ఇబ్బందులతో జీవించడం బాధాకరమన్నారు. కాంగ్రెస్ ప్రభుత్వం మేనిఫెస్టోలో 250 గజాల ఇంటి స్థలం, పింఛన్, కేసుల ఎత్తివేత, అమరుల కుటుంబాలకు ఉద్యోగం వంటి హామీలు ఇచ్చి మూడేళ్లుగా కమిటీల పేరుతో కాలయాపన చేస్తోందని విమర్శించారు.
ఈ కార్యక్రమంలో అక్కెనపెల్లి కరుణాకర్, కుసపెల్లి సరస్వతి, సింగారం దేవరాజు, కర్నె లక్ష్మీ తదితర ఉద్యమకారులు పాల్గొన్నారు.
